Zirehli texnika itkilərinin ümumi azalması fonunda Rusiya ordusu köhnə T-62 tanklarını daha tez-tez itirməyə başlayıb. Bu barədə Ukraynaya qarşı müharibədə məhv edilmiş texnikanın vizual qeydini aparan Warspotting.net resursunun məlumatlarına istinadən hərbi analitik Riçard Vereker bildirib.
SİA xəbər verir ki, təhlillərə görə, 2025-ci ilin mart-iyul aylarında T-62 itkiləri 2,5 dəfə artıb.
Mütəxəssislərin fikrincə, bu onunla əlaqədardır ki, bu köhnə modellər daha çox döyüşlərdə istifadə olunur, Rusiya isə daha yeni tankları, xüsusən də T-80-ni qorunmaq üçün ehtiyata salmağa çalışır.
Ümumilikdə, Ukraynanın tammiqyaslı işğalı başlayandan bəri Rusiya ən azı 3545 tank itirib.
Ən çox T-72 (1529 ədəd), sonra T-80 (1113), T-62 (274) və T-90 (168) gəlir.
Eyni zamanda, 2025-ci ilin iyun və iyul aylarında ən aşağı itkilər qeydə alınıb: müvafiq olaraq cəmi 19 və 25 tank. Belə bir azalma təkcə zirehli texnikadan istifadə taktikasında dəyişiklikləri deyil, həm də Rusiyanın hazırda saxlamağa çalışdığı ən son modellərin ehtiyatlarının kritik tükənməsini göstərir.
T-62 – bu tank haqqında nə məlumdur…
T-62, 1950-ci illərdə T-55-in davamçısı kimi hazırlanmış sovet əsas döyüş tankıdır.
Bu, 115 mm-lik hamar lüləli silahla təchiz edilmiş dünyada ilk seriyalı tank oldu. T-62-nin zirehləri və silahlanmaları sələfi ilə müqayisədə gücləndirilmişdi, lakin daha müasir modellərin meydana çıxması ilə onun dizaynı tez köhnəlmişdir.
İstehsal 1961-ci ildən 1975-ci ilə qədər davam etdi, bundan sonra tanklar əsasən xidmətdən çıxarıldı. Rusiya hazırda müasir texnika çatışmazlığı səbəbindən T-62-ləri fəal şəkildə cəbhəyə qaytarır, bəzi nəqliyyat vasitələrini Ukraynaya qarşı müharibədə istifadə etmək üçün modernləşdirir.
Əli Babayev
